सीमोल्लंघन मनाचे

ऋतु-रंग मान्सुन आक्रमितो प्रवास परतीचा,

अवखळ आक्टोबर वाढवतो काळ दिवसाचा,

मृदुगंध मधाळ, ढगाळ गडगडाटी आभासाचा.

मुक्त लहरी हवा, बाष्पी चक्रिय वारा,

तेज-पाती शलाका प्रीत करी तृषार्त धरा,

धरती अनुभवे उत्साही सुदत्त निसर्ग नजारा.

धुंद पखरण हिरवळीची जशी मखमल रानावना,

चातक-मन वाट पाहे जणु सहज एकरुप भावना,

वाहता पाऊस-पाणी, खोल ओलावा येईल राना.

उन्नत उसळती अगणित स्वप्न देव-कारंजी,

बरसती मुक्त ईश्वरी-धारा रिमझिम रात्रं दिवशी,

भिजवती चिंबचिंब सुंदर लोभस रुप सर्वांगीं.

सप्तमीचा कडक फुलोरा उदो उदो महाशक्तीचा,

अष्टमी-नवमीचा जागर, उत्सव तव महाभक्तीचा,

दशमीचा विजय प्रगटे अथांग अवकाश प्रतिमांचा.

स्वच्छंद मन शोधते भाव बंध सीमारेषांचे,

नव-श्वासाचे,नव-संकल्पनांचे,नव-स्पुलिंगांचे !

सृजन हे घडवते, सीमोल्लंघन मनामनांचे !!!

-सुनील पंडित.